Sentyabrın 28-də İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti tərəfindən Ulu öndər Heydər Əliyevin 100 illiyi münasibətilə “Azad rəqabət mühitinin formalaşdırılması və istehlakçı hüquqlarının müdafiəsinin təmin edilməsində Heydər Əliyevin rolu” mövzusunda forum keçirilib.

Tədbirdə dövlət və özəl sektorun nümayəndələri, biznes assosiasiyaları, ticarət palataları və ali təhsil müəssisələrinin təmsilçiləri iştirak ediblər. Forumda Azərbaycan Qida və İçki Sənayeçiləri Assosiasiyasının idarə heyəti üzvləri və üzv olan şirkətlər də iştirak edib.

Forumda çıxış edən iqtisadiyyat nazirinin müavini Sahib Məmmədov, Ümummilli Lider Heydər Əliyevin 1993-2003-cü illərdə Azərbaycanın milli iqtisadi inkişafının formalaşmasının uğurlu inkişafına istiqamətlənmiş keçid modelinin əsaslarını müəyyənləşdirdiyini vurğulayıb. O, qeyd edib ki, Ulu öndərin müdrik siyasəti əsasında həyata keçirilən tədbirlərin nəticəsi olaraq azad bazar iqtisadiyyatının təşəkkül tapması ilə iqtisadiyyatın diversifikasiyası, qeyri-neft sektorunun və regionların inkişafı sürətlənib.

Antiinhisar və İstehlak Bazarına Nəzarət Dövlət Xidmətinin rəisi Məmməd Abbasbəyli milli iqtisadiyyatın inkişafı və ölkənin iqtisadi qüdrətinin artırılmasında Ümummilli lider Heydər Əliyevin rəhbərliyi altında aparılan islahatlardan bəhs edib. O, vurğulayıb ki, Ulu öndərin həyata keçirdiyi sosial-iqtisadi inkişaf strategiyası bu gün dövlət başçısı İlham Əliyev tərəfindən uğurla davam etdirilir və məhz ardıcıl, məqsədyönlü iqtisadi siyasət nəticəsində ölkədə bazar iqtisadiyyatına keçid prosesi başa çatdırılıb.

Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov, azad rəqabət mühitinin formalaşdırılması və istehlakçıların hüquqlarının müdafiəsinin təmin edilməsində Ulu öndər Heydər Əliyevin misilsiz xidmətlərini vurğulayaraq, agentliyin istehlakçı hüquqları ilə bağlı sahibkarlarla apardığı iş barədə fikirlərini bölüşüb.

Forum çərçivəsində, iştirakçılar istehlakçı hüquqlarının müdafiəsi, azad bazar şəraitində sahibkarlıq fəaliyyəti və iqtisadiyyatın müxtəlif sektorlarında rəqabətin gücləndirilməsi məsələlərini müzakirə ediblər. Tədbirin sonunda, “Azərbaycanda istehlakçı hüquqlarının müdafiəsi sistemində sahibkarlıq subyektlərinin rolu” mövzusunda panel müzakirəsi keçirilib. Panel müzakirəsində, iştirakçılar istehlakçı hüquqlarının qorunması və bu sahədəki problemlərin həlli yolları barədə geniş fikir mübadiləsi aparıblar.

Forum, Ulu öndər Heydər Əliyevin iqtisadi siyasətinin və rəhbərliyinin Azərbaycan iqtisadiyyatına verdiyi töhfələri bir daha xatırlatmaq və bu sahədə əldə olunan uğurları qeyd etmək baxımından böyük əhəmiyyət kəsb edib. Tədbir, iştirakçılar arasında əməkdaşlıq və əlaqələrin gücləndirilməsi, eləcə də gələcəkdə həyata keçiriləcək layihələr üçün möhkəm zəmin yaratmaq məqsədi ilə səmərəli bir platforma olub.